Lydia Vázquez Jiménez Euskal Herriko Unibertsitateko katedradunak Frantziako Errepublikako Arteen eta Letren Zaldunaren intsignia jaso du Marianne Carré Frantziak Bilbon duen kontsul nagusiaren eskutik. Ekitaldia Bilbon izan zen, Institutu Frantsesaren egoitzan, urriaren 29an, asteartean.

Frantziako kondekorazio horrek, kulturaren arloko ospetsuenetako batek, pertsona esanguratsuak saritzen ditu artearen esparruan egindako sorkuntzagatik. Atzerritar batek bereizketa hori jaso dezan, bere herrialdearen eta Frantziaren arteko elkarrizketa kulturalari egiten dion ekarpena hartzen da kontuan. Zehazki, Lydia Vazquezek frantsesez idatzitako liburu ugari itzuli ditu gaztelaniara, besteak beste, Annie Ernaux Literaturako Nobel saridunaren lana.

Irakaslea oso hunkituta sentitu zen sariarekin: "Oso sari garrantzitsua da niretzat, Frantziako Errepublikak mundu hispanofonoan arte eta letra frantsesen eta frankofonoen bitartekari eta hedatzaile gisa egindako lana aintzatesten baitu. Arteen eta Letren Zalditeria titulu honek, gainera, kultura frantses eta frankofonoen enbaxadore bihurtzen nau Euskadin, Espainian eta Latinoamerikan, eta nire ahotsa entzungarriagoa izango da hemendik aurrera. Maila pertsonalean, harrotasun handia da. Horregatik, izendapen hau nire gurasoei eskaini diet, nitaz oso harro egongo baitziren, bai eta hainbeste urteko ikasleei ere (berrogei urte daramatzat irakasle hainbat unibertsitatetan, bereziki UPV/EHUn), bai eta lankideei ere (antzinako ikasle asko), egunez egun Euskadin frantsesa eta kultura frankofonoa irakasten laguntzen baitute ".

Lydia Vázquez Jiménez espezializatuta dago XVIII. mendeko frantses literaturan, beste arte batzuekin alderatuta, eta literatur itzulpengintza. UPV/EHUn doktoratu zen, XVIII. mendeko literatura frantsesari buruzko tesi batekin. Ikergai izan ditu literatura erotikoa, literatura eta generoa, literatura frankofonoen eta espainiarren harrera eta literatura eta animaliak. UPV/EHUko Frantziako Ikasketen Genero Ikertaldeko ikertzaile nagusia da.