Aski ezaguna da UPV/EHUk esparru akademiko tradizionaletan egiten duen lana (graduak, berezko tituluak, masterrak, udako ikastaroak...). Esperientzia Gelek Giza Zientzietako Unibertsitate Tituluaren bidez 55 urtetik gorako biztanleentzat garatzen duten jarduera zertxobait ezezagunagoa da, baina ez garrantzi gutxiagokoa. Hala ere, 25 urte daramatza unibertsitate-kultura Bizkaiko eta Bilboko biztanleen artean hedatzen. Ikasturte honetan, adibidez, Bizkaiko 450 adineko baino gehiago daude ikasgeletan.

Esperientzia Gelen XXV. urteurrena ospatzeko sortu den bideoa:

Proiektu honek urte hauetan guztietan sortu dituen esperientziak errepasatu, baloratu eta ospatzeko balio izan du gaurko topaketak. "Gaur egun, Esperientzia Gelak Giza Zientzien berezko tituluan trebatzera zuzendutako ikastegi akademiko bat baino askoz gehiago dira. Esperientzia integrala da, lagunena, ikastaro osagarriena, kultura-, musika-, antzerki- eta aisialdi-jarduerena. Eta, etorkizunera begira, ziur nago datozen urteetan proiektu hau ez dela mantenduko soilik, indartu egingo dela, lortu duena sendotuz eta ekimen eta esperientzia berriak bilatuz ", azaldu du Eva Ferreira Euskal Herriko Unibertsitateko errektoreak.

Gonbidatuen artean Gorka Moreno Bizkaiko Campuseko errektoreordea, Manuel Montero UPV/EHUko errektore ohia, Amaia Irazusta Gipuzkoako Esperientzia Geletako zuzendaria, Aritz Ruiz Arabako Esperientzia Geletako zuzendaria, Mikel Bilbao eta Josetxo Urrutikoetxea Bizkaiko Esperientzia Geletako zuzendari ohiak izan dira. Gainera, ordezkari akademikoak, Gelako irakasleak eta lehengo eta egungo ikasleak bertaratu dira.

25 promozio eta 2.000 ikasle baino gehiago

Orain arte 25 promozio eta 2.000 ikasle baino gehiago igaro dira Bilboko Alde Zaharreko Banco de España kaleko 2. zenbakian dagoen egoitzatik. Unibertsitateko irakaskuntzak emateaz gain, 55 urtetik gorako pertsonen garapen soziokulturala eta giza garapena sustatzeko jarduera osagarriak egiten dira gela horietan. Programa akademikoa bi unibertsitate-ikasketa motaren inguruan egituratzen da: Giza Zientzietako Unibertsitate Titulua (4 ikastaro) eta, hori amaituta, Unibertsitate Ikastaro Osagarriak, hiru prestakuntza-ibilbideren bidez.

"Bizkaiko Esperientzia Gelak unibertsitate-irakaskuntzak ematen diren gune bat baino gehiago dira. Hasieratik funtzio kultural, dibulgatzaile eta sozializatzaile garrantzitsua bete dute, ikuspegi positibo, aktibo, parte-hartzaile, bokazio komunitario batetik ", adierazi du Idoia Igartuak, Bizkaiko Esperientzia Gelen zuzendariak.

Historia

Lehenengo urratsak Bilbao Bizkaia Kutxarekin (BBK) lankidetza estuan eman ziren. Horren ondorioz, Bilboko Alde Zaharrean dagoen Espainiako bankuaren eraikin zaharra birgaitu eta laga zen. Gaur egun, proiektua indartuta agertzen da. "Ikasleen, irakasleen eta irakasle ez diren langileen aldetik izaten ari den harrerak hasitako bidetik jarraitzera bultzatzen gaitu, eta Bizkaiko eta Euskal Herriko gizarte osoari guri eustea komeni dela helarazten saiatzera", gehitu du Igartuak.

Unibertsitate-proiektu honen protagonistak adinagatik edo bestelako arrazoiengatik lan-etapa amaitutzat eman duten pertsonak dira. Ondorioz, ikasketak beren prestakuntza intelektuala osatu nahi duten 55 urtetik gorako pertsona guztiei zuzenduta daude (erretiratuak, aurre-erretiratuak, etab.). Gela hauetan sartzeko ez da aurretiko titulaziorik edo baldintza akademikorik eskatzen. Horrela, ekimena pertsona orori irekita dago, bizipen berriei, bai akademikoei, irekitzeko kezka eta gogoa dutenei.

Bilbao Balioen Hiria sariak

Bizkaiko Esperientzia Gelak saritu dituzte aurten VI. Bilbao Balioen Hiria 2024 sarietan. Seigarren edizio honetako epaimahaiak Bizkaiko Esperientzia Gelek duten hezkuntza-funtzioa azpimarratu zuen, baita gizartean, kulturan eta dibulgazioan egindako lan handia ere. Bilboko Udalak bultzatutako sari horien helburua da jendaurrean aitortzea elkartasuna, aniztasuna, inklusioa eta justizia soziala bezalako balioak sustatzen dituzten ekimenak, auzo, barruti edo hiri mailan gauzatu direnak edo gauzatzen ari direnak.